Hopp til hovedinnhold

Suoma stáhtaguossit

Odne ovdalgaskabeaivvi besai Majestehta Gonagas sávvat Suoma Presidentii H.E. Sauli Niinistö ja roavvái Jenni Haukioi buresboahtima Norgii. Gonagas ja Dronnet leaba vuostáiváldit Suoma Presideantabára golmmabeaivásaš stáhtaguossástallamis Norggas.

10.10.2012

Guossástallan álggahuvvui almmolaččat allaáiggalaš buresboahtinseremoniijain Šloahttašiljus, gos ledje sihke Majestehtaguovttos Gonagas ja Dronnet, Ruvdnaprinsabárra ja ollu eará almmolaš Norgga ovddasteaddjit.
 

Presideanta fárus leaba Suoma olgoritministtar ja gávpeministtar, ja sin fárus leat maid ollu eará ealáhusjođiheaddjit ja davviguovlluid áššedovdit. Guossástallama váldofádda lea davviguovlluid ovttasbarggu nanusmahttin.


Kránsabidjan Nationalmonumeantta luhtte

Go gerge almmolaš lunššain Gonagaslaš šloahtas, de láidesteigga Gonagas Harald ja Dronnet Sonja presideantabára Akershus festningai. Vieru mielde galgá guossástalli stáhtaoaivámuš bidjat lieđđekránssa nationalmomuneantta lusa Akershusas. Presideanta Niinistö inspiserii vuos gudnigardena ovdal go bijai kránssa dan muitomearkka lusa mii lea ceggejuvvon muitun norgalaččaide geat gahčče 2.máilmmisoađis.


Maŋŋil kránsabidjama láidestii Gonagas Presideantta Niinistö Stuoradiggái, gos son galggai deaivvadit doaibmi Stuoradiggepresideanttain Per Kristian Foss. Otná beaivvi mielde galgá Presideanta maid deaivvadit Stáhtaministariin Jens Stoltenberg.


Suoma grafihkka

Eske veaigin finaiga Dronnet Sonja ja roavvá Jenni Haukio Galleri Kunstverket báikkis, gos odne rahppojuvvui čájáhus man namma lea Fire Grafiske Fortellinger. Čájáhus presentere njeallje suoma grafihkkára ja sin bargguid, namalassii Tiina Kivinen, Ari Pelkonen, Jaana Paulus ja Annu Vertanen. Ja lei ge juste Tiina Kivinen guhte lei vuosttaš gii ovdalaš dán jagi oaččui stipeandda vuođđudusas H.M. Dronning Sonjas kunstnerstipend.


Buot diet njeallje dáiddára leat iežaset áiggi dáiddárat, geat geavahit máŋga čuohtejagi boares teknihkaid maiguin speadjalastet dálá servodaga. Čájáhus lea ovttasbargu gaskal galleriija ja suoma-norgga kulturinstituhta.


Gállamállásat

Eahkes lágideaba Gonagas ja Dronnet gállamállásiid 193 guossái Gonagaslaš šloahtas gudnin Presidentii Sauli Niinistö ja roavvái Jenni Haukio. Ruvdnaprinsa Haakon ja Ruvdnaprinseassa Mette-Marit leaba maid doppe.

 

Ihttin galgaba Gonagas Harald ja Dronnet Sonja čuovvut Suoma presideantabára, ja sudno prográmmas leat hui ollu doaimmat, earet eará logaldallamat, ealáhusčoahkkimat, guossástallan Girjjálašvuođaviesus/Litteraturhuset, Rommen skuvllas ja kulturguovddážis.

 

Høytidelig velkomstseremoni for det finske presidentparet (Foto: Det kongelige hoff)
Fáktadieđut


Dieđut Suoma birra

Oaivegávpot: Helsset (Helsinki)
Stuorámus gávpogat: Helsset, Tammerfors ja Åbo

Viidodat: 338 000 km²

Olmmošlohku 2012: sullii 5,3 miljovnna
Almmolaš gielat: Almmolaš gielat: Suomagiella, ruoŧagiella, ja (muhtun suohkaniin) sámegiella.

Stivrenvuohki: Republihkka
Stáhtaoaivámuš 2012: Presideanta Sauli Niinistö

Norgga ja Suoma diplomáhtalaš oktavuođat ásahuvvo cuoŋománu 6.beaivvi 1918, maŋŋá go suopmelaččat almmuhedje iežaset sierranan Ruošša fámu vuolde eret juovlamánu 6.beaivi 1917.

Suoma ja Norgga gaskavuohta lea hui buorre, lea lagas oktavuohta eanas surggiin politihkas, suodjalusas, kulturdoaimmain ja ealáhusain. Majestehtaguovttos Gonagas ja Dronnet leigga Suomas stáhtaguossástallamis 2007:s.

2010:s lei Suopma Norgga 11.deháleamos gálvooastiriika, ja 13.deháleamos gálvovuovdinriika, ja dien guovtti riikka gaskanisgávppašeapmi lea lassáneamen. Dál leat sullii 220 norgalaš fitnodaga ásahuvvon Supmii.

Gáldu: OD

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas