Hopp til hovedinnhold

Stuoradikki allaáiggalaš rahpan

Odne rabai Majestehta Gonagas Harald 157. dábálaš Stuoradikki allaáiggalaččat –seremoniija čađahuvvo Vuođđolága § 74 mearrádusa mielde.

02.10.2012

Stuoradiggi čoahkkana dábálaččat vuosttaš árgabeaivvi golggotmánus, ja maŋŋá go Stuoradiggepresideanta lea almmuhan ahte Stuoradiggi lea lobálaččat vuođđuduvvon, de boahtá Majestehta Gonagas. Maŋemus jagiid lea maid Majestehta Dronnet ja Gonagaslaš Allavuohta Ruvdnaprinsa čuvvon seremoniija.

Truvdnasárdni ja Riikka dilálašvuohta

Seremoniijas leat guokte váldooasi: Truvdnasárdni ja Čilgehus mii muitala riikka dilálašvuođa birra. Gonagas lohká Truvdnasártni, muhto dan leat Ráđđehusa áirasat čállán. Sárdni čájeha ráđđehusa politihka váldolinnjáid boahtte jahkái. Duorastaga álgá ruvdnasárdnedebáhtta, gos Ráđđehus ja opposišuvdna digaštallet dehálaš osiid sártni sisdoalus.

Truvdnasártni maŋŋil lea čilgehus mas muitaluvvo riikka dilálašvuođa birra. Dat lea dieđáhus dan birra maid Ráđđehus lea olahan maŋemus jagi, ja árbevieru mielde lea Ráđđehus nuoramus lahttu mii dan lohká. Dán jagi lei aitto nammaduvvon kulturministtar Hadia Tajik mii logai dien dieđáhusa.

Go čilgehus lea lohkkojuvvon, de addá stáhtaministtar dan Gonagassii, gii fas addá sihke Truvdnasártni ja Čilgehusa riikka dilálašvuođa birra Stuoradiggepresidentii.

Stuoradiggepresideanttas lea alimus almmolaš ámmát Norggas maŋábealde Gonagasa, ja Stuoradiggepresideanta Dag Terje Andersen doalai iežas sártni ovdal go sii loahpahedje seremoniija Ja vi elsker vuosttaš vearssa lávlumiin. NRK sáddii olles seremoniija njuolga Stuoradiggesálas.

Vuođđoláhka mearrida seremoniija

Stuoradikki rahpanseremoniija lea mearridduvvon Vuođđolága § 74:s:

”Saasnart Storthinget har konstitueret sig, aabner Kongen eller den, han dertil beskikker, dets Forhandlinger med en Tale, hvori han underretter det om Rigets Tilstand og de Gjenstande, hvorpaa han især ønsker at henlede Storthingets Opmærksomhed. Ingen Deliberation maa finde Sted i Kongens Nærværelse."

 

 

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas