Hopp til hovedinnhold

«Hurra for deg!»

Riegádanlávlla čuojai Šloahttašiljus odne.Badjel 3.000 mánáigárdemáná ledje boahtán Šloahta lusa ávvudit Gonagasbára. Majestehtaguovttos Gonagas Harald ja Dronnet Sonja návddašeigga mánáid lávlaga Šloahttabalkoŋggas.

07.06.2012

Sihke Gonagas ja Dronnet deavdiba 75 jagi dán jagi, ja odne ávvudedje sudno goappešagaid drillčájehallamiin ja riegádanbeailávlagiin Šloahttašiljus. Miessemánu 17. beaivvi devdet skuvlamánát Šloahttašilju. Odne lei ges mánáidgárdemánáid vuorru. Sii ožžo bollaid ja sáfta ja besse Gonagas Gardena drillčájehallama geahččat, ovdal go ieža lávlo Gonagasbárrii riegádanbeailávlaga hui jitnosit.

Šloahttabalkoŋggas čužžo sihke Gonagasbárra, Ruvdnaprinsabárra bearrašiin ja Prinseassa Märtha Louise ja Ari Behn iežaska nieiddažiiguin, Prinseassa Astrid, Ferner roavvá ja Johan Martin Ferner.

Bollat ja sáfta

Oslo suohkan guossohii buot mánáide riegádanbeabollaid ja sáfta, ja hoava bargit bassi iluin daid addit mánáide. Ollu goret guorranedje ja šadde ain eambbo viežžat Šloahtas vai buohkat ožžo.

Drillčájehallan

Majestehta Gonagasa Gardena drillsoalddáhat dolle čájáhusa Šloahttašiljus ávvudeddjiide gudnin. Sin gal liikojedje mánát oaidnit, ja go Oslo sátnejođiheaddji Fabian Stang jearai mánáin hálidivčče go sii maid nie máhttit, de gal ollugat vástidedje ahte sii hálidivčče šaddat gardistan.

Lihkkusávaldagat

Gonagas ja Dronnet leaba maid ožžon ollu lihkkusávaldagaid almmolaš Norggas odne. Oslo sátnejođiheaddji lei vuosttaš gii buvttii sávaldagaid, dasto Suohkansuorggi organisášuvnna ovddasteaddjit, Girku, Fylkamánnet, Suodjalus, Sámediggi ja diplomáhtat.

Alismusrievttijustitiarius Tore Schei, stáhtaministtar Jens Stoltenberg ja Stuoradikki presideanta, Dag Terje Andersen sávve maid lihku.

Feastačájáhus Operadáhkis

Eahkes lei Ráđđehus bovden buohkaid nuvttá feastačájáhussii Operadáhki alde. Gonagas ja Dronnet bođiiga Operai Stjernen Kongesjaluppain,ovttas Ruvdnaprinsabearrašiin, Behn bearrašiin ja Prinseassa Astrid, Ferner roavvá lei maid fárus.

Herborg Kråkevik álggahii lágideami gos ledje sihke sáhkavuorut, teakstalohkamat, videodearvvuođat, musihkka ja balleahtat. Oslo filharmoniske orkester čuojahiii ja akkompagnerii sihke ođđa ja bures dovddus artisttaid geain lei máŋgga lágan musihkka.

 

3.000 mánáidgárdemáná lávlo riegádanbeailávlaga dalle go Gonagas ja Dronnet devddiiga 75 jagir. Govven: Liv Osmundsen, Gonagaslaš hoavva.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas