Gonagaslaš hoavva ovdanbuktá 2024 jahkeraportta
2024:s gallededje Gonagasviesu áirasat oktiibuot 42 suohkana ja fylkkamátkkit Agderii, Rogalándii ja Trøndelágii ledje stuorámus mátkkit. Gonagasviessu čađahii maiddái máŋgga olgoriikkamátkki Eurohpas, Amerihkás ja Gaska-Nuorttas. Oktiibuot ledje 743 virggálaš doaimma. Gonagasbárra lágidii maiddái njeallje stáhtaguossástallama ovtta jagis – juoga mii lea historjjálaš.
Gonagaslaš Allavuohta Prinseassa Ingrid Alexandra álggahii suodjalusa vuosttašgearddebálvalusa ođđajagimánus ja olles jagi 2024 lea son bálvalan inšenevrabataljovnnas Brigáda Nordas, Skjold leairras Romssas. Prinseassa bálvalusvirgi lea leamaš uđasinšenevrasoalddát, ja son lea leamaš báhččin CV 90:s. Prinsa Sverre Magnus loahpahii 13 jagi skuvlavázzima geassemánus. Seammás go nuoramusat rávásmuvvet ja gávdnet iežaset geainnuid, de almmuhii Majestehta Gonagas giđđat 2024 ahte son dahká muhtun nuppástusaid iežas prográmmas, go dáhttu vuhtiiváldit iežas agi.
Gonagaslaš prográmma stivre Gonagaslaš hoava doaimma, ja rievdadusat Gonagasviesu lahtuid eallindiliin váikkuhit Hoava doaimmaide. Rievdadusat servodagas oppalaččat maiddái váikkuhit. Dasa gullet earret eará rievdaduvvon sihkarvuođagáibádusat earálágan uhkádusdili geažil, ođđa lágat ja láhkaásahusat, njuolggadusat ja rapporterengáibádusat. Rievddadeaddji dálkkádatdilit váikkuhit dasa mo párkkaid galgá hálddašit. Mii bargat čađat dainna mot sáhttit ovdánahttit ođđaáigásaš hoava mii sáhttá deavdit rievddadeaddji rámmaeavttuid, vuordámušaid ja gáibádusaid – earret eará eanet beaktiis ressursaávkkástallama bokte.
Gonagas lea stáhtaoaivámuš, ja Gonagas lea isit, áhčči ja áddjá. Eallindahku – nugo eallin ieš – lea máŋga oasis. Ilut ja hástalusat bohtet vurrolaga guhkes eallimis ja karrieres. 2024 lei jahki go sihke illu ja hástalusat báidne Gonagasviesu ja Gonagaslaš hoava.
Jahkerehketdoallu
Gonagaslaš civillisttu jahkerehketdoallu lea čovdojuvvon rehketdoallobohtosiin mii čájeha 2,87 miljovnna ruvnno vuollaibáhcaga jagi juolludeami ektui. Boađus lea vuordámušaid mielde, ja váilevašvuohta gokčojuvvo ovdalaš várrejumiiguin plána mielde.
Juolludeamit máŋggajagáš prošeavttaide poastta 51 vuođul, nu go sihkarvuođaprošeakta ja digitaliserenprošeakta, eai čuovo juolludemiid fásaid ja prošeakta čájeha danne rehketdoallovuolláibáhcaga 2024:s mii lea 18,7 miljovnna ruvnno. Dát gokčojuvvo ovdalaš várrejumiiguin poasttas 51.
Gonagaslaš hoava doaibmarehketdoallu čájeha 14,49 miljovnna ruvnno rehketdoallovuoittu. Váldosivat dása leat muhtun muddui prošeavttaid ollašuhttima maŋideapmi, visttiid bajásdoallan, unniduvvon elrávnnjegolut, ja jahkebargguid logu njeaidin.
Gonagaslaš hoava 2024 jahkeraporta oktan jahkedieđáhusain lea geigejuvvon Stuorradikki presideantagoddái, Digitaliseren- ja hálddahusdepartementii, ja Riikkarevišuvdnii.
Stuorát govva
Juogat dán artihkkala Twitteris ja Facebookas:
Juogat dán artihkkala Twitteris Juogat dán artihkkala FacebookasÁigeguovdilis áššit
Gonagaslaš hoavva ovdanbuktá 2023 jahkeraportta
Gonagasviesu doaimmat diibmá speadjalastet otná Norgga. Gonagasbearraša mátkkit 47 suohkanii, almmolaš galledeamit viđa eurohpalaš riikkain, iešguđetlágan lágideamit ovttas riikka suodjalusain ja riikka gearggusvuođa guovdilastin, čájeha mii lea dehálaš Norgii ja masa gonagasbearaš lea bidjan návccaid.
Lihkusávaldagat Dánmárkku ođđa gonagasbárrii
Majestehta Gonagas Harald cealká liekkus lihkusávaldagaid Majestehta Gonagas Frederik X ja Majestehta Dronnet Mary guoktái truvdnolotnahuvvama oktavuođas Dánmárkkus.