Gonagas Harald rabai Stuoradikki

Lea 31. geardde Gonagas Harald lohká truvdnosártni nationálačoahkkima ovddas, ja otná stuoradiggeráhpan lea dat 57. gos Gonagas lea sajis.

Gonagas Harald lea sajis 57. geardde. Govva: Peter Mydske / Stuoradiggi

Truvdnosárdni

Truvdnosárdni lea ráđđehusa politihkalaš plánat lagamus boahtte áigái. Ráhkaduvvo ráđđehusas, muhto lea Gonagas guhte lohká dan.

Go Stuoradikkis lea ođđa eanetlohku čavčča válggaid maŋis, de dan jagáš truvdnosárdni lei oaneheabbo go dábálaččat.

Historjá

Dat allaáiggálaš ráhpan lea okta dain deháleamos konstitutionála geatnegasvuođain Gonagasas, čállojuvvon Vuođđolága 74. paragráfii:

“Nu fargga go Stuoradiggi lea konstitueren iežas, de dan rahpá Gonagas dahje dat geasa son oskkilda dan doaimma. Son rahpá Stuoradikki gieđahallamiid sártniin mas muitala riikka dili birra ja dilálašvuođaid maid son earenoamážit dáhttu čalmmustahttit Stuoradiggái. Ii makkárge ákkastallan galgga dáhpáhuvvat dan áiggis go Gonagas lea das.”

Stáhtaministtar Erna Solberg geige truvdnosártni Gonagassii stuoradiggesálas. Govva: Peter Mydske / Stuoradiggi

Paragráfas vuolgá ahte Stuoradiggi ii sáhte áššiid meannudit nu guhka go Gonagas lea stuoradiggevisttis, juoga mii guoská fápmojuogadanvuođđoipmárdussii.

Truvdnosártni maŋŋel stáhtaráđđi Odd Emil Ingebrigtsen logai “dieđáhusa Riika dili birra”.

Gonagas boahtá Stuoradiggái

Gonagasbárra bođii Šloahtas Stuoradiggái rabas biillain. Miehta Karl Johan gáhta soalddáhat buot suodjalussurggiin paraderejedje Gonagasa ja Dronnega ovddas.

Stuoradikkis stuoradiggeáirras Bjørnar Selnes Skjæran jođihii deputašuvnna mii vuostáiválddii Gonagasbára ja Ruvdnaprinssa.

Deputašuvnnas ledje čieža stuoradiggeáirasat Nordland fylkkas. Earret eará Skjærana, deputašuvnna fárus ledje stuoradiggeáirasat Siv Mossleth, Bård Ludvig Thorheim, Mona Nilsen, Dagfinn Henrik Olsen, Wilfred Nordlund ja Øystein Mathisen.

Gonagas Harald lea boahtán Stuoradiggái ja deputašuvdna sávvá sutnje buresboahtima. Govva: Morten Brakestad / Stuoradiggi

Deputašuvdna mieđušta Gonagaslaččaid nu guhká go sii leat Stuoradiggevisttis.

Ođđa stuoradiggepresideanta

Stuoradiggi bođii čoahkkái golggotmánu 9. beaivvi, ja konstitueren čoahkkimis Eva Kristin Hansen válljejuvvui ođđa stuoradiggepresideantan. Svein Harberg, Nils T. Bjørke, Morten Wold, Sverre Myrli ja Ingrid Fiskaa válljejuvvojedje várrepresideantan.

Gonagasbárra boahtá rabas biillain Šlohttii, Stuoradikki rahpama maŋŋel. Govva: Sven Gj. Gjeruldsen, Gonagaslaš hoavva