Polena ja Norgga ovttasbargu

Gonagas ja Presideanta bođiige Olgešbellodaga Vissui odne iđđes,  gos soai ovttas rabaiga ealáhusseminára mii čuvge Polena ja Norgga ovttasbarggu offshore, energiija ja mearraealáhus surggiin. Polen lea okta logi deháleamos riikkain maiguin Norga gávppaša, ja Norgga gálvovuovdin Polenii lassána.

Maŋŋel seminára rahpama vulggiiga Gonagas Harald ja Presideanta Duda  Nobelinstituhttii, gos Presideanta doalai logaldallama.

Suodjalusovttasbargu

Norggas ja Polenis lea lagas ovttasbargu NATOs, ja dan namuhii ge maid Gonagas Harald sártnistis gállamállásiin mat lágiduvvo gudnin stáhtaguossástallamii ikte eahkes.

- Polenis lea guovddáš sadji suodjaluslihtolaččaid searvvis, sihke riikka sturrodaga ja dan geográfalaš sajusteami dáfus, ja Polen galgá lágidit boahtte NATO- alimus dási čoahkkima Warszawaa suoidnemánus. Suodjalusindustriijas lea mis lagas ovttasbargu. Danin lea ge sihkarvuođas ja suodjalusas guovddáš sadji dál go presideanta lea guossástallamin Norggas, logai Gonagas.

Odne čuovui Gonagas Harald Presideantta Akershus ladnái, gos sudnuide presenterejedje NASAMS (Norwegian Advanced Surface to Air Missile System) rakeahttasystema.  Soai beasaiga maid duođaštit šiehtadusa mii čállojuvvui gaskal Kongsberg Gruppen ja  Polish Armament Group, mas diet guokte fitnodaga leat soahpan viiddidit ovttasbarggu. Sis lea juo ovttasbargu mii guoská riddosuodjalussystemaid vuovdimii polskalaš mearrasuodjalussii.

Viidáseappot Budejjui

Dasto beasai stáhtaministtar Erna Solberg sávvat buresboahtima ráđđehusa lunšii gudnin stáhtaguossástallamii. Sihke Gonagas Harald, Polena presideantabárra ja Gonagaslaš Allavuohta Ruvdnaprinseassa Mette-Marit serve lunšii mii lei Akershus šloahtas.

Maŋŋelgaskabeaivvi vuolgiba Presideanta Andrzej Duda ja su roavvá  Agata Kornhauser-Duda viidáseappot Budejjui. Majestehta Gonagas čuovvu sudno maiddái Nordlánddas, ja son lea presideantabára guossin almmolaš mállásiin Budejjus odne eahkes.