Ruvdnaprinsa St. Petersburggas
Odne álggahii Gonagaslaš Allavuohta Ruvdnaprinsa Haakon golmmabeaivásaš almmolaš guossástallama Ruoššas. Ruvdnaprinsa galgá earet eará ovddidit Norgga ealáhusdoaimmaid nannenbargguid St. Petersburg ja Leningrad fylkkain.
Mátkkis lea fárus Ealáhus – ja guolástandepartemeantta stáhtačálli Dilek Ayan, Oljo- ja energiijadepartemeantta stáhtačálli Kåre Fostervold ja Olgoriikadepartemeantta stáhtačálli Bård Glad Pedersen.
St. Petersburg generálkonsuláhta
Go Ruvdnaprinsa joavddai dohko, de son lei álggos fárus Norgga St. Petersburg generálkonsuláhta ođđa lanjaid rahpandilálašvuođas. Generálkonsuláhta fárrii daid lanjaide loahpageahčen miessemánu 2013, ja doppe barget logi virggálačča – vihtta norgalačča ja vihtta ruošša mielbargi. Maŋŋil rahpandilálašvuođa besse guossit geahčadit konsuláhta lanjaid.
Máŋga stuora Norgga fitnodaga leat álggahan doaimmaid dien guovllus. Ruvdnaprinsa Haakon áigu fitnat guovtti fitnodaga guossis mat doppe leat, namalassii Málabuvttadanfitnodaga Jotun ja FMC Technologies, mii lea máilmmi stuorámus fitnodat mii ráhkada rusttegiid oljo- ja gássadoaimmaide mearabotnis.
Generálkonsuláhta doaibmá St. Petersburg, Novgorod ja Pskov fylkkain ja Karelia Republihkas, ja buot diein guovlluin lei boahtán ovddasteaddji konsuláhta rahpandilálašvuhtii. Ámmátguovlu lea oktiibuot 370.000 njealjádaskilomehter viiddu, sullii seamma stuoris go Norga, ja dan guovllus ásset birrasiid ovcci miljovnna olbmo.
Láse oarjjásguvlui
Peter den store ásahii St. Petersburg gávpoga 1703:s, ja dat galggai leat su «láse oarjjás guvlui». Gávpogis ásset birrasiid vihtta miljovnna olbmo, ja dat lea dehálaš industriija ja ekonomalaš guovddášbáiki. Doppe leat guovddáš ruošša dutkan -ja oahppoásahusat.
St. Petersburg lea dovddus vuosttažettiin danin go doppe lea rikkis historjá ja kulturárbi. Eremitasjen musea lea dovddus miehtá máilmmi, doppe leat stuora vuorkáčoakkáldagat mat leat lágiduvvon guđa gárdimii, okta dain lea Dálvepalássa.
Juogat dán artihkkala Twitteris ja Facebookas:
Juogat dán artihkkala Twitteris Juogat dán artihkkala FacebookasÁigeguovdilis áššit

- Stuora illun beassat leat dáppe davvin
Návvuotna lei maŋemus bisánanbáiki Romssas dán jagáš fylkkamátkkis, man oktavuođas maiddái čađahuvvo guossástallan Svalbárddas. Dat lea Gonagasbára vuosttaš virggálaš galledeapmi suohkanis gos kveana, sámi ja norgga kultuvrrat ellet bálddalga.

Miessemánu 17. beaivvi ávvudeapmi
Gonagasbearaš lea badjel 100 jagi juo vuostáiváldán mánáidtogaid Šloahttabalkoŋggas Oslos. Dán árbevieru álggahii Gonagas Haakon 1906:s. Dál lea mánáidtoga ja miessemánu 17. beaivi measta seamma ášši, muhto nu ii leat álo leamaš.