Prinseassa Märtha Louise biografiija
Prinseassa Märtha Louise riegádii čakčamánu 22. Beaivvi 1971 Rikshospitálas Oslos. Son lea Majestehta Gonagas Harald ja Majestehta Dronnet Sonja nieida.
Prinseassa Märtha Louise lea áhku- áhči eatni- gáibmi, Ruvdnaprinseassa Märtha, ja dasto Gonagas Haakon eatni, Dronnet Louise, gáibmi. Prinseassa lea njealját árbenráiddus Norgga truvdnui, su siessala Prinsa Sverre Magnusa, maŋis.
Prinseassa Märtha Louise ii čađat almmolaš doaimmaid Gonagasviesu ovddas, muhto lea Prinseassa Märtha Louise Foandda stivrajođiheaddji.
Prinseassa Märtha Louise Foanda
Prinseassa Märtha Louise foanda ásahuvvui čakčamánu 15. beaivvi 1972, ja foandda kapitála vuoitu galgá geavahuvvot doaibmabijuide mat leat veahkkin ja illun doaibmahehttejuvvon mánáide Norggas. Doarjagiid juolludeapmi dahkko Prinseassa Märtha Louise riegádanbeaivvi čakčamánu, 22. beaivvi.
Iežas fitnodat
Prinseassa Märtha Louise jođiha ovttaolbmofitnodaga ja dan bokte son čađaha iešguđetlágan kommersiála doaimmaid, nugo girjealmmuhemiid, bivttasvuovdima, kurssaid ja logaldallamiid. Prinseassa lea čállán girjjiid ja buvttadan jietnagirjjiid, ja lea leamaš prográmmajođiheaddji máŋga tv-ráiddus. 2002 rájes lea son leamaš iešheanalaš ealáhusdoalli ja máksá vearu. Prinseassa Märtha Louise ii leat vuostáiváldán apanasje-bálkká dan rájes go álggahii su kommersiála doaimmaid.
Bearaš
Geassemánu 7. beaivve jagis 2022 almmuheigga Prinseassa Märtha Louise ja amerihkálaš Durek Verrett ahte leaba lohpádallan, ja soai náitaleigga Geirangeris borgemánu 31. beaivve 2024.
Prinseassa Märtha Louisesleat golbma nieidda ovddeš náittosdilis girječálliin Ari Behnain (1972-2019). Maud Angelica riegádii jagis 2003, Leah Isadora riegádii 2005 ja Emma Tallulah riegádii ges jagis 2008. Buot golmmas leat gásttašuvvon Šloahttakapeallas. Prinseassa lei náittosdilis Ari Behnain miessemánu 24. beaivve rájes 2002 gitta 2017 rádjai.
Prinseassa Märtha Louise rolla
Rollačielggadeamit
Ovttas Majestehta Gonagasain ja lagamus bearrašiin mearridii Prinseassa Märtha Louise 2022:s ahte son dál ii galgga čađahit virggálaš doaimmaid Gonagasviesu ovddas. Ulbmilin mearrádusain lea váikkuhit dasa ahte šaddá čielgaset erohus su iežas doaimmaid ja Gonagasviesu gullevašvuođa gaskkas.
Jagis 2019 mearridii Prinseassa ovttasráđi bearrašiin ahte son ii galgga geavahit prinseassanamahusa su ealáhusdoaimmaid oktavuođas.Dán prinsihppa guoská dál maiddái su isidii, Durek Verrett.
Dat mearkkaša ahte eaba galgga oainnusindahkat sudno gullevašvuođa Gonagasvissui sosiála mediakanálain gos maiddái gávppálaš doaibma dáhpáhuvvá, mediabuvttademiin dahje eará gávppálaš doaimmaid oktavuođas @tagging bokte, prinseassanamahusa geavaheami bokte, dahje eará Gonagasviesu lahtuid govaid dahje namuheami bokte. Dása gullet jearahallamat main lea váldoulbmil čalmmustahttit gávppálaš doaimmaid.
Durek Verretta rolla
Nugo Erling Lorentzen, Johan Martin Ferner ja Ari Behn, de šattai Durek Verrett oassin Gonagasbearrašis go náitalii Prinseassa Märtha Louisein. Seamma ládje go sis, de ii leat sus gonagaslaš namma ii ge ovddas Gonagasviesu.
Prinseassa Märtha Louise ja Durek Verrett leaba mielde bearašdoaluin ja dihto stuorát lágidemiin gosa lea vierrun ahte Gonagasbearaš searvá ovttas.
Bajásšaddan
Prinseassa Märtha Louise vieljainis, Gonagaslaš Allavuohta Ruvdnaprinsa Haakon, bajásšattaiga luonddu birrasis Skaugumis, mii lea Ruvdnaprinsabára almmolaš ásodat Skaugumis Askeris. Váhnemat deattuheigga garrasit ahte mánáguoktá bajásšaddan galggai leat eanemus lági mielde seammalágan go norgga nuorain muđui. Danin lea Prinseassaleamaš suohkanmánáidgárddis, vázzán dábálaš skuvlla ja oassálastán iešguđetlágan astoáiggedoaimmain. Prinseassa lea earret eará lávlon koaras, čuojahan njurggonasa (tverrfløyte) ja dánson álbmotdánsumiid.Olu jagiid lei Prinseassa Märtha Louise áŋgir riidet ja lei mielde riikajoavkkus máŋga jagi.
Prinseassa Märtha Louise oahppu
Oahppu
Prinseassa Märhta Louise váccii Smestad skuvllas Oslos, ja gearggai Kristelig Gymnasium joatkkaskuvllas Oslos jagis 1990. Prinseassas ledje gielat čiekŋudahttinfágan.
Seamma čavčča fárrii Prinseassa Englándii hárjehallat riidenvaláštallama ja maiddái studeret girjjálašvuođa Oxford Universitehtas. Maŋŋel hárjehallagođii son Arena UK riidenguovddážis oahppat vel eanet sprangrytter - gilvoriidema.
1992 čavčča álggii Prinseassa Märtha Louise skuvlavázzima Bjørknes nammasaš priváhtaskuvllas Oslos. Maŋŋel jotkkii son studeantan Høgskolen i Oslo gos čađahii fysioterapevta oahpu. Hárjehallanáigodaga čađahii son Maastrichtas Nederlánddas.
Prinseassa gearggai fysioterapevtaoahpuin 1997 juovlamánu, ja jagis 2000 oaččui son Rosenterapevta duođaštusa.