Prinsa Sverre Magnusa biografiija

Prinsa Sverre Magnus riegádii juovlamánu 3. beavvi 2005 Rikshospitaletis Oslos. Prinsa lea goalmmádin Norgga truvnnu árbenráiddus áhčis Gonagaslaš Allavuođa Haakona ja oappá Gonagaslaš Allavuođa Prinseassa Ingrid Alexandra maŋis.

Prinsa Sverre Magnus. Govven: Dusan Reljin

Prinsa Sverre Magnus čađaha muhtun virggálaš doaimmaid Gonagasviesu ovddas. Miessemánu 28. beaivvi 2025 lei vuosttaš geardde go ovddastii okto, go son oassálasttii Norgga joavkku áŋgiruššama čalmmustahttimis Special Olympics-gilvvuin Torinos.

2025 giđa čađahii Prinsa Sverre Magnus su vuosttaš almmolaš doaimma okto. Dalle son searvvai vuostáiváldindoaluin ráđđehusa ovddastusásodagas gosa bohte Torino Special Olympics oasseváldit ja sin veahkit. Govven: Jonas Been Henriksen / NTB

Ovttas Prinseassa Ingrid Alexandrain rabai son maiddái Rukses Ruossa geassegearggusvuođa Kadettangenis Bærumas geassemánus 2025. Govven: Terje Pedersen / NTB

Prinsa lea máŋga jagi doaimmalaččat searvan ja ovddastan Team Skauguma ustitvuođagilvvuin Skaugumas Askeris. Govven: Lise Åserud / NTB

Bajásšaddan

Njukčamánu 4. beaivve 2006 gásttašuvvui Prinsa Šloahttakapeallas ja lei dalá bisma Oslo bismagottis Ole Kristian Kvarme gii gásttašii su.

Prinssa ristváhnemat leat Majestehta Dronnet Sonja,Majestehta Dronnet MáximaNederlánddas, Gonagaslaš Allavuohta Ruvdnaprinsa Pavlos , Prinseassa Rosario Bulgarias, Espen Høiby, Bjørn Stensland ja Marianne Gjellestad.

Govven lagamus bearrašiin 18-jagi ávvudeami oktavuođas. Govven: Heiko Junge, NTB

Prinsa Sverre Magnus konfirmerejuvvui čakčamánu 5. beaivve 2020. Son čuovui oahpahusa Askera searvegottis ja konfirmašuvdnaipmilbálvalus lei Askera girkus.

Skuvlavázzin

2011 čavčča álggii Prinsa Sverre Magnus vuosttaš luohkkái Jansløkka skuvllas Askeris. Jagiid 2014 rájes gitta 2020 rádjái váccii Prinsa Montessoriskuvlla Oslos.

Prinsa Sverre Magnus álggii Elvebakken joatkkaskuvlii Oslos čakčat 2021, diehtoteknologiija ja mediabuvttadeami oahppoprográmmas.

2024 giđa lei son ruošša. Oahppit, bearaš ja oahpaheaddjit čoahkkanedje Oslo konseartavissui skuvlla loahpahandoaluide disdaga geassemánu 18. beaivvi.

Prinsa Sverre Magnus loahpahii joatkkaskuvlla 2024 giđa. Ruvdnaprinsa Haakon ja Ruvdnaprinseassa Mette-Marit čuovuiga skuvlla loahpahanseremoniija. Govven: Liv Anette Luane, Gonagaslaš hoavva

Válddálašvuođabeaivi

Sotnabeaivvi juovlamánu 3. beaivve 2023 devddii Prinsa Sverre Magnus 18 jagi. Bearjadaga ovdal bovdii Gonagasbárra almmolaš beaivemállásiidda Šloahtas ávvudandihte válddálašvuođabeaivvi.

Smávva feastasálas Šloahtas ledje stellen bevddiid 69 olbmui. Bearraša ja ristváhnemiid lassin ledje almmolaš Norgga ovddasteaddjit ja olu nuoraidorganisašuvnnaid ovddasteaddjit bovdejuvvon guossin almmolaš beaivemállásiidda.

Astoáigi

Prinssas lea stuora beroštupmi govvemii ja filmmaide. Son liiko sabehiidda, vuosttamužžan alpiidna čierastallansurggiide ja juogada maiddái bearraša beroštumi čáhcevaláštallamiidda.