Fokus: Máilmmi nissonolbmuid dearvvašvuohta

Gonagaslaš Allavuohta Ruvdnaprinseassa lea hui áŋgir searvat bargguide mat galget nannet nissonolbmuid dearvvašvuođa ja vejolašvuođaid miehtá máilmmi. Vuođđojuolgin dán barggus lea prošeakta maid son ieš leamaš mielde ásaheamen: Maverick Collective.

2010:s nammaduvvui Ruvdnaprinseassa Young Global Leader doibmii Máilmmi ekonomalaš forumis Davosas. Son bovdejuvvui maid sin nuoramus jođiheddjiid fierpmádaga, The Global Shapers Community stivralahttun. Diet forum ásahuvvui danin go badjel bealli máilmmi álbmogis dál lea vuollel 27 jagi – ja danin lea ge vel deháleabbo dán áiggi ahte nuoraid jietna gullojuvvo.

Olles dán internašuvnnalaš áŋggirdeami vuođul – ja maiddái dan duogážis ahte son ollu jagiid lea bargan hiv/aids gažaldagaiguin – oinnii Ruvdnaprinseassa dárbbu ásahit ulbmillaš prošeavtta nannen várás nuorra nissonolbmuid dearvvašvuođa miehtá máilmmi. Women Deliver konferánssas Københámmanis miessemánu 2016, álggahii son ja Kate Roberts, Population Services International (PSI) ja Melinda Gates Maverick Collective ovttas .

Maverick Collective

Maverick Collective lea organiserejuvvon muhtun lágan fáddarortnegin, gos juohkehaš gii das lea fárus investere ekonomalaš resurssaid, áiggi ja áŋgirvuođa «iežas» prošektii. Prošeavttaid jođiha PSI ovttasbarggus báikkálaš organisašuvnnaiguin.

10 jahkásaš Zubeda lea čeahpes oahppi gii liiko skuvlii. Oahppu lea geaidnu eret geafivuođas, muhto tuberkulosa ja unnán biebmu návccahuhttá su. Dákkár deaivvadeamit leat vuođđun dasa go Ruvdnaprinseassas lea nu stuora beroštupmi nissonolbmuid dearvvašvuhtii ja vejolašvuođaide. Govven: Henrik Myhr Nielsen, NRK

Maverick Collective barggu vuođul nammadii Fast Company 2016:s Ruvdnaprinseassa oktan máilmmi eanemus hutkás olmmožin ja Foreign Policy Magazine bijai su maid máilmmi 100 buoremus jurddašeaddji jođiheddjiid searvái (Leading Global Thinkers).

Bilaterála ovttasbargu

Almmolaš mátkkiin olgoriikkain, doaimmain maid ráđđehus lea mearridan ja maid Olgoriikadepartemeanta jođiha, láve Ruvdnaprinseassa Mette-Marit álo giddet beroštumi bargguide mat nannejit nissonolbmuid dearvvašvuođa ja sin vejolašvuođaid. Dán fáddásuorggis bargá Ruvdnaprinseassa maid suodjalanorganisašuvnnaid bokte nugo Rukses Ruossa ja Forum for Kvinner ja Utvikling.