Fokus: Psyhkalaš dearvvašvuohta

Bealli Norgga álbmogis boahtá muhtumin eallináiggis oažžut psykalaš váttuid maid hálddašeapmái dárbbaša ámmátveahki. Psykalaš dearvvašvuohta lea guovddážis Gonagaslaš Allavuođa Ruvdnaprinseassa barggus.

Ruvdnaprinseassa čalmmustahtii dán suorggi hui čielgasit 2004:s, dalle go son lei Hjerterom TV-akšuvnna suodjaleaddji. Dan akšuvnnas čohkkejedje ruđa Girku Gávpotmišuvdnii ja Psykalaš dearvvašvuođa ráđđái. Dan rájes lea Ruvdnaprinseassa gidden stuora beroštumi dán fáddái. Son lea Psykalaš dearvvašvuođa ráđi suodjaleaddji ja lea leamaš Girku Gávpotmišuvnna stivralahttu.

Psykalaš dearvvašvuođa ráđđi

Ruvdnaprinseassa Mette-Marit šattai Psykalaš dearvvašvuođa ráđi suodjaleaddjin juo 2001:s. Son lea jagiid mielde leamaš ollu guossástallanmátkkiin gos lea deaivvadan olbmuiguin geain leat psykalaš váttut ja sin lagamuččaiguin.

Ruvdnaprinseassa lea juohke jagi leamaš mielde psykalaš dearvvašvuođa Máilmmibeaivvi čalmmustahttimis, mii lágiduvvo juohke jagi golggotmánu 10.beaivvi. Dat lea internašuvnnalaš čalmmustahttinbeaivi, mii galgá juohkit dieđuid ja oažžut eanet rabasvuođa psykalaš dearvvašvuođa birra. Psykalaš dearvvašvuođa Máilmmibeaivi lea lágiduvvon juohke jagi 1992 rájes.

Ruvdnaprinseassa olggobealde Asker Kulturviesu gos son lei mielde Mentála dearvvašvuođa Nuoraid čalmmustahttimis psykalaš dearvvašvuođa Máilmmibeaivvi 2016. Govven: Cornelius Poppe / NTB Scanpix

Psykalaš dearvvašvuođa ráđđi lea friddja, humaniteara organisašuvdna mas leat 25 miellahttoorganisašuvnna. Ráđi bargun lea oažžut nu buori eallima go vejolaš mánáide ja nuoraide geat rahčet psykalaš váttisvuođaiguin ja sin lagamuččaide. Organisašuvdna bargá oažžut lagas ja ollislaš veahki, bargoeallima masa sáhttet searvat ja hástalusaiguin mat gusket bággočovdosiid geavaheapmái.

Ráđđi geassá garrasit ovdan dan makkár mearkkašupmi psykalaš váttuid eastadanbargguin lea. Dainna ferte álgit juo mánáidgárddis, oaivvilda Ráđđi: Lea buoret hukset mánáid go divodit rávisolbmuid. Okta dehálaš oassi dán barggus lei Beaivválašlihkku/Hverdagslykke prošeakta, mii lei mánáidgárddiid várás.

Ruvdnaprinseassa Mette-Marit finai Keyserløkka mánáidgárddi guossis Psykalaš dearvvašvuođa Máilmmibeaivvi 2012. Mánáidgárdi lei mielde Hverdagslykke prošeavttas. Govven: Gorm Kallestad / NTB Scanpix.

Guossemállásat Skaugumis

2004 TV-akšuvnna oktavuođas bovdii Ruvdnaprinsabárra vuosttaš geardde guossemállásiidda Skaugumii, mii lea Ruvdnaprinsabára orrunbáiki Askeris.

Juohke jagi dan maŋŋá lea Ruvdnaprinsabárra bovden gussiid miehtá riikka, geain juogaládje leat hástalusat mat čatnasit psykalaš dearvvašvuhtii. Ovttasbargoguoimmit geat bovdejuvvojit guossin, barget iešguđetládje dan badjelii ahte ásahit lieggasit, árvasit ja eanet ovttastahtti servodaga. Dat lea ásahusat nugo Girku Gávpotmišuvdna, Frelsesarmeen, Landsforeningen for barnehjemsbarn ja gáhttamagasiidna Erlik Oslo.

Dát lea šaddan jahkásaš árbevierrun, ja 2014:s ávvudedje guossástallit 10-jagi ávvudeami.

2014:s ledje Rukses Ruossa eaktodáhtolaš bargit bovdejuvvon guossemállásiidda Skaugumii. Govven: Håkon Mosvold Larsen / NTB Scanpix