India 2006

2006:s lei Ruvdnaprinsabárra ovtta vahku almmolaš guossástallamis Indias. Guossástallamii gulle ollu čoahkkimat, konferánssat ja kulturprográmmat, sihke Rajasthanis, New Delhis, Agras ja Mombaias.

Mánnodaga golggotmánu 30. beaivvi - Mombai

Go Ruvdnaprinsabárra lei geargan čoahkkimastimin Maharashtra guvernørain, Somanahalli Mallaiah Krishna, de soai čuovuiga oljo- ja gássaseminára: "Exploring Opportunities for Cooperation between Indian and Norwegian companies in Oil and Gas and the Maritime Sector."

Dan maŋŋil lei Gonagaslaš Allavuohta Ruvdnaprinsa mielde ”Norway as a Tourist Destination for India” seminára rahpamis, ja Gonagaslaš Allavuohta Ruvdnaprinseassa lei fas mielde norgga – india filbma workshopas.

Maŋŋil rabai Gonagaslaš Allavuohta Ruvdnaprinsa norgga filbmavahku Mombaias.

Distaga golggotmánu 31. beaivvi - Mombai ja Agra

Ruvdnaprinsabárra oassálastii ”Indo-Norwegian Maritime Cooperation Forum” rahpamis.

Dan maŋŋá beasai Gonagaslaš Allavuohta Ruvdnaprinsa oahpásnuvvat Reliance industries doaimmaide ja lei mielde Orkla ođđa kántuvrra rahpamis Mombaias, ja Gonagaslaš Allavuohta Ruvdanprinseassa finai ges dáppe: "Indian Institute of Hotel Management" ja ossodagas mii dikšu HIV/AIDS-pasieanttaid Sion Hospitalas.

Maŋŋelgaskabeaivvi mátkoštii Ruvdnaprinsabárra viidáseappot Agrai jaTaj Mahalii, mausoleai maid Shah Jahan huksehii iežas dronnegii muitun.

Ruvdnaprinsabárra bođii New Delhii distat eahkes.

Gaskavahku skábmamánu 1. beaivvi - New Delhi

Gaskavahku finaiga soai álggos Rajghat báikkis, gos Ruvdnaprinsabárra bijai kránssa India stuora jođiheaddji Mahatma Gandhi muitobáikái.

Dan maŋŋil manaiga soai Stáhtaministara Dr. Manmohan Singh čoahkkimii, ovdalgo Ruvdnaprinsabárra manai lunsja boradit nuorra politihkalaš jođiheddjiiguin Indias. Dan dilálašvuođa lei norgga ambassáda lágidan.

Ruvdnaprinsabáras lei maid čoahkkin Presideanttain A.P.J. Abdul Kalam ja maŋŋil maid Várrepresideanttain Bhairon Singh Shekhawat. Maŋŋelgaskabeaivvi doalai Gonagaslaš Allavuohta Ruvdnaprinsa logaldallama Indian Council for World Affairs (ICWA), man bajilčála lei Peace and Development - Why should we engage?

Duorastaga skábmamánu 2. beaivvi- New Delhi

Ruvdnaprinsabárra čuovui máŋga seminára mat čalmmustahtte Norgga-India ovttasbarggu:

"India-Norway Business Cooperation"
"Norwegian Salmon Academy" (Gonagaslaš Allavuohta Ruvdnaprinsa)
"Norway as a Tourist Destination" (Gonagaslaš Allavuohta Ruvdnaprinseassa)

"Panchayati Raj" lea ráđđi mas leat vihtta miellahtu giliiddásis, ja leat dat vuolemus dássi india demokratiijas. Oassi dieid ráđiid sajiin lea mearriduvvon nissonolbmuide, dat lea váikkuhan demokratiija nannemii ja nissonolbmuid dili buorideapmái. Ruvdnaprinsabárra čuovui seremoniija gos 188 nissonolbmo ožžo skuvladuođašaid go leat jagi leamaš oahpus oahppat movt bargat diein ráđiin. Dát dilálašvuohta lágiduvvui našuvnnalaš giehteduodjemuseas.

Maŋŋelgaskabeaivvi čuovui Ruvdnaprinsabárra Ibsenseminára "Nora's Sisters". Seminára lei oassin Ibsenjagi 2006 čalmmustahttemis.

Duorastat maŋŋelgaskabeaivi loahpahuvvui norgga-india konsearttain Sanskriti Schoolas.

Bearjadaga skábmamánu 3. beaivvi - Rajasthan

Iđđesbeaivvi finai Ruvdnaprinsabárra Community Health Centeris Chomus. Duogáš dán guossástallamii lea Norgga-India ovttasbargu mii guoská mánáidjápmima eastadeapmái.

Maŋŋil čájehedje Ruvdnaprinsabárrii Amber Forta olggobealde Jaipur. Amber Fort lea dat ladni Indias mii lea buoremusat doalahuvvon ortnegis, dat lea huksejuvvon vilges marmoras ja rukses sáttogeđggiiguin.

Maŋŋelgaskabeaivvi ledje čoahkkimat Rajasthan oassestáhtaráđđehusa stáhtaministariin Ms. Vasundhara Raje, ja Rajasthan guvernørain, Ms. Pratibha Devisingh Patil.