Hopp til hovedinnhold

Dronnet Sonja DáiddaStállja

Dronnet Sonja DáiddaStállja lea Šloahta boares stálljavisttiin – dat lea oassi Šloahtas mii ovdal ii lean álbmogii rabas.

Iešalddis lanjat lea Majestehta Gonagasa skeaŋka Majestehta Dronnegii. Diet boares stállja lea geavahuvvon vurkkodanrádjun 2.máilmmisoađi rájes. Dál lea dat ráhkaduvvon báikin gos sáhttet oaidnit dáidaga ja kultuvrra, ja dan almmolaš rahpan lei Dronnega 80-jagi beaivvi, suoidnemánu 4. beaivvi 2017. Suoidnemánu 5. beaivvi rájes lea Dronnet Sonja DáiddaStállja rabas gehččiide.

Gonagaslaš leaŋgagámmir

Go heasttat vulge eret stáljas maŋemus geardde, de bázii stállja vuorkábáikin ja garášan 75 jagi. Muhto okta latnja orui duohtatkeahttá. Dan uksa dahppojuvvui ja latnja  «vajáldahttojuvvui». Dat lei Gonagaslaš leaŋgagámmir,  latnja gos vurkkoduvvojedje buot leaŋggat, sálat ja biergasat mat gullet heasttaide ja heasttagearruide.

Dien lanjas lea áigi bisánan. Buot lea nugo dalle go leaŋggat heŋgejuvvo dohko maŋemus geardde. Assás lásiid duohken, alla láseskábiid siste, láhttis gitta dáhkevuollái, heaŋgájit buot heastadávvirat čábbát ordnejuvvon. Doppe leat roseahtta páradegearruid dávvirat, kruvnnot ja riikkavearju – ja dávvirat priváhta fievrruide. Juohke dávvir lea earenoamážit heivehuvvon guđege heasttagerrui ja guđege heastta sturrodahkii ja iešvuođaide – danin go biergasat galget hui bures bissut sajis. Dien láhkái vuhtiiváldi sihke gonagasa, vuoddji ja heastta sihkarvuođa.

Prinsesse Märtha Louise ønsker velkommen til Det kongelige selekammer. Selekammeret har aldri tidligere vært tilgjengelig for publikum. Foto: Christian Lagaard, Det kongelige hoff

Dien gámmiris ii rievdaduvvon mihkkege dalle go stálja ođasmahtte. Dat lea juste seammaládje dál, go lei dalle go uksa giddejuvvui.

Leaŋgagámmir rahppojuvvui álbmogii DáiddaStálja nuppi čájáhusa oktavuođas, mii lei: «Gonagaslaš stállja. Heastadoallu ja ekvipašat 1905-1940». Jietna muitala gussiide dán ovddolaš gámmira birra. Lea Prinseassa Märtha Louise jietna mii lea báddejuvvon– son lea Gonagasbearrašis dat guhte eanet go earát lea fievrredan viidáseappot Gonagasbearraša riidenárbevieru, maŋŋel Dronnet Maud.

Gonagaslaš stállja

Stálljavisttit huksejuvvojedje gaskal 1845 ja 1848 , šloahttaarkiteavtta H.D.F. Linstow tennjegiid mielde, ja Gonagas Haakon ja Dronning Maud viiddideigga daid 1911:s. Gonagaslaš heastadoalu árbevieru fievrredii Dronnet Maud Englánddas, ja stálja huksemii geavahuvvui The Royal Mews ovdagovvan, mii lea Buckingham Palace stálljarusttet. Viiddiduvvon stálljavisttiide čáhke ollu ođđa doaimmat, nugo riidenvisti mas lea sierra gehččiidossodat ja musihkka tribune, badji ja buohccistállja.

Govva: Jan Haug, Gonagaslaš hoavva

Dronnet Maud dáhtu mielde virgáibiddjojuvvui brihttalaš stálljahoavda ja áiggi mielde 13 stálljabargi geat ásse gaskastáljaid 2. etášas. Gaskastáljaide sáhtte čáhkat 38 heastta, ja dasa lassin vel vovnnat, heasttaid leaŋgabiergasat ja salat.

Maŋŋil go Dronnet Maud jámii 1938:s, unnui heastadoallu, ja maŋemus heasttat jávke Gonagaslaš stáljain dakka maŋŋá go soahti álggii 1940:s. Go Gonagasbearaš máhcai Šlohttii 1945:s, de lei biilasáhttu. Heasttaid áigi lei vássán.

Dronnet Sonja Dáiddastálja rahpan mearkkaša ahte boares stállja šaddá fas ealas. Hiŋgaliin gokko heasttat okte čužžo, dain besset geahččit dál vásihit dáidaga ja historjjá.

 

11.11.2019

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas
Fáktadieđut

Rahpanáiggit

Dronnet Sonja DáiddaStállja lea dábálaččat rabas 11.00 rájes 17.00 rádjái buot beivviid geasset, dálvet dat lea gitta mánnodagaid. Muhto muhtomin šaddat giddet danin go leat giddejuvvon lágideamit dahje go leat ođđa čájáhusa bidjamin. Iskka rahpanáiggiid DáiddaStálja facebooksiiddus.

Dronnet Sonja DáiddaStállja. Govva: Nina Ilefeldt, Gonagaslaš hoavva
Fáktadieđut

Bileahtat Dronnet Sonja Dáiddastálljii

Bileahtaid oažžu oastit dien báikkis.
Bileahttahattit:

  • Rávisolbmot: 100,-

  • Vuollel 12 jahkásaš mánáide nuvttá

  • Gonagaslaš šloahta geahčadeapmái sáhttá oastit kombinašuvdnabileahta, mainna beassá sihke Šlohttii ja Dáiddastálljii. Kombinašuvdnabileahta oažžu oastit dušše dan áiggis go Šloahtta lea gehččiide rabas, ja dušše ovdagihtii oastimiin Ticketmaster bokte.

    Kombinašuvdnabileahtta máksá 200,-
Shanghai urna lei skeaŋka Gonagas Haakon ja Dronnet Maud ruvdnemii (Govva: Kjartan Hauglid, Gonagaslaš hoavva)
Fáktadieđut

Lágideamit DáiddaStáljas

Dronnet Sonja DáiddaStáljas lea sierra Facebook siidu. Doppe gávnnat dárkilit dieđuid čájáhusaid ja lágidemiid birra mat leat Dronnet Sonja DáiddaStáljas.