Prinseassa Ingrid Alexandras biografiija
Gonagaslaš Allavuohta Prinseassa Ingrid Alexandra riegádii Rikshospitálas Oslos ođđajagimánu 21. beaivvi 2004. Prinseassa lea nubbin árbenráiddus, áhčis Ruvdnaprinssa Haakon maŋis.
Prinseassa Ingrid Alexandra lea bajásšaddan Skaugumis, mii lea Ruvdnaprinsabára almmolaš ásodat Askeris.
Cuoŋománu 17. beaivvi 2004 gásttašuvvui Prinseassa Šloahttakapeallas. Bisma Gunnar Stålsett gásttašii su, ja áddjá, Majestehta Gonagas Harald, lei doalliristáhčči. Buot ristváhnemat ledje boahtán Prinseassa konfirmašuvdnii Šloahttakapeallas borgemánu 31. beaivvi 2019. Bisma Kari Veiteberg ja Karoline Astrup, doaibmi suohkanbáhppa Asker searvegottis, čađaheigga seremoniija.
Almmolaš doaimmat
Jagis 2009 čalmmustahttii Prinseassa Ingrid Alexandra Máilmmi birasbeaivvi ja dearvvahiiBirasageantaparáda (Miljøagentparade) Šloahttašiljus. Dát lei su vuosttaš almmolaš doaibma, earret miessemánu 17.beaivvi ávvudeapmi ja Holmenkollen.
Veahážiid mielde leat almmolaš doaimmat lassánan, ja go Prinseassa olahii válddálašvuođaagi ođđajagimánu 21. beaivve 2022, de oaččui son iežas kantuvrra Gonagaslaš šloahtas. Lagamus jagiid lea dattege su deháleamos bargun ain vuoruhit oahpu.
Prinseassa Ingrid Alexandra: Skuvlavázzin
Skuvlavázzin
Ođđajagimánus 2006 álggii Prinseassa Ingrid Alexandra mánáidgárdái Askeris, ja 2010 čavčča šattai son Jansløkka mánáidskuvlla skuvlanieiddaš. 2014 čavčča rájes 2019 giđđii váccii son Oslo Internašuvnnalaš skuvlla, ja dál lea son oahppin Uranienborg skuvllas Oslos.
2020 čavčča šattai Prinseassa Elvebakken nammasaš joatkkaskuvlla-oahppin, Oslos. 2023 giđa lei son russa, ja loahpahanseremoniija lágiduvvui geassemánu 20. beaivve 2023.
2024-2025 čađahii Prinseassa Ingrid Alexandra 15-mánnosaš vuosttasgearddebálvalusa Brigade Nord Inšenevrabataljovnnas.
2025 borgemánu álggahii Prinseassa servodatdiehtaga bacheloraoahpu Sydney Universitehtas, Australias. Dán gráda oahpahus bistá golbma jagi. Son lea válljen čiekŋudit iežas riikkaidgaskasaš oktavuođaide ja politihkalaš ekonomiijai.
Prinseassa Ingrid Alexandra
Čájeha 8 oktiibuot 21
Astoáigi
Prinseassa lea aktiivvalaš nieida ja liiko valáštallamii ja olgoáibmodoaimmaide. Nugo Ruvdnaprinsabearaš muđui, de liiko son maiddái čuoigamii ja čáhcevaláštallamii.