Majestehta Gonagasa vuođđolágalaš sadji

Majestehta Gonagasa geatnegasvuođat leat eanas dat ahte galgá ovddastit ja čuovvut seremoniijaid. Go Vuođđolága bustávva ain dadjá ahte juolludeaddi fápmu gullá Gonagassii, det dát dán áigge mearkkaša “Gonagas stáhtaráđis”. Praktihkalaččat dát mearkkaša ráđđehus, muhto mearrádusaid ferte Gonagas vuolláičállit ja lassin ferte dábálaččat stáhtaministtar maiddái vuolláičállit ovdal go lea gustovaš.

Gonagas doaimmaha Stuoradikki almmolaš rahpama juohke čavčča, ja sus lea dehálaš bargu go ráđđehus molsašuvvá ja son jođiha Stáhtaráđi juohke bearjadaga Gonagaslaš šloahtas. Gonagas ja Dronnet fitnaba stáhtaguossástallamiin olgoriikkain ja soai vuostáiváldiba olgoriikkaid stáhtaoaivámuččaid go sii bohtet min riikii guossin. Lea Gonagas gii vuostáiváldá amas riikkaid ambassadevrraid Oslos go sii buktet iežaset dovddusindahkanreivviid allaáiggalaš audieanssas Šloahtas. Sus lea generáladássi Eanansuodjalusas ja Áibmosuodjalusas ja lea Mearrasuodjalusas admirála, ja son lea riikka bajemus befálaolmmái.

Beaivválaš bargguide Gonagaslaš šloahtas gullet maid audieansat, ovdanbuktimat, ságastallamat stáhtaministariin, olgoritministariin ja Suodjalusa ovddasteddjiiguin. Gonagas fitná dávjá priváhta ja almmolaš institušuvnnain iežas mátkkiin miehtá riikka.