Njuike váldosisdollui

Gonagasbárra čuovvumin Barents Rescue

Stuora hirpmuslaš riđđu Ivgus Romssas lea vuolggabáiki Barents Rescue gádjunhárjehallamii 2013. Majestehtaguovttos Gonagas ja Dronnet finaiga eske dien hárjehallama geahččamin

18.09.2013

Barents Rescue lea stuora gádjun- ja ovttasbargohárjehallan mas leat mielde Norgga, Ruoŧa, Suoma ja Ruošša gádjunveagat. Diet njeallje riikka leat ráhkadan šiehtadusa mii čilge movt galget ovttasbargat riikkarájiid rastá jus stuora roassu dahje lihkuhisvuohta dáhpáhuvvá. Hárjehallan lágiduvvo vurrolaga juohke nuppi jagi, ja das leat mielde organisašuvnnat ja etáhtat mat šaddet searvat jus šaddá dárbu stuora gádjunoperašuvdnii Barentsguovllus. Dán jagi lea Norga lágideaddjinašuvdna, ja lea Servodatsihkarvuođa-ja gearggusvuođadirektoráhtta (DSB) mii leamaš váldoovddasvástideaddjin plánenbarggus.

Nuortanjárgga-várri Ivgus birasta dán jagaš hárjehallamiid. Doppe leat buot eanemus eahpesihkkaris várremássat olles Norggas, ja jus doppe vuolgá riđđu, de dat dagahivččii issoras billistemiid miehtá Ivguvuona.

Máŋga vahku juo hárjehallan

Vaikko iešalddis dat operatiiva oassi hárjehallamis lea čakčamánu 17.-19. beivviid, de leat gádjunveagat juo máŋga vahku hárjehallan ovttasdoaimma ja gearggusvuođa. Leat Romssa fylkkamánne ja Gáivuona, Ivgu ja Omasvuona suohkanat, politiija ja NVE mat maŋemus vahkuid leat simuleren gearggusvuođarasttildeami ruonás fiskadii, fiskadis oránšii – ja ruoksadii. Badjel 1000 olbmo dien njealji riikkas leat leamaš fárus.

Geahčadeamen Nuortanjárgga-vári

Gonagas ja Dronnet beasaiga helikopteris geahččat Nuortanjárgga-vári, seammás go fylkkamánne Svein Ludvigsen ja DSB direktevra Jon Lea muitaleigga ášši birra. Go jovde várrečohkkii, de beasai Gonagasbárra vázzit doppe guide, Nordnorsk Fjellovervåking nubbinjođiheaddji Bernt Lyngstad ja Åknes/Tafjord Beredskap hoavdageologa Lars Harald Blikra fárus.

Jus tunneallas buolligoahtá

Go máhcce váris fas vulos, de mátkkoštedje Pollfjell-tunellii. Dál lea buollin tuneallain hui áigeguovdilis ášši, ja jus Pollfjell-tunneallas buolligoađášii, de dat šattašii issoras stuora senário, masa dán jagi Barents Rescue gádjunveahka hárjehalai. Gonagasbárra beasai čuovvut dramáhtalaš gádjunakšuvnna.

Base camp

Dasto joavddaiga Gonagas Harald ja Dronnet Sonja Lyngenhállii ja Eidebakken skuvlii, mii lea hárjehallama kommandoguovddáš ja «Base camp».  Doppe čájehedje skuvlla Gonagasbárrii ja soai beasaiga maid oaidnit Barents Rescue fasilitehtaid.  Gonagasbárra beasai maid rektor Astrid Ma Strøm ja Jon Lea fárus dearvvahit sihke bargiid ja skuvlla ohppiid.



Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas