Njuike váldosisdollui

Riddárčuoigan 2013

Árbevirolaš Ridderrennet lágiduvvo dán jagi 50. geardde. Čuoigamiid suodjaleaddji, Prinseassa Märtha Louise, ja Gonagaslaš Allavuođaguovttos Ruvdnaprinsa ja Ruvdnaprinseassa leigga maid mielde láidesteaddjin otná čuoigamiin.

13.04.2013

Riddárčuoigamat leat lágiduvvon vihttalot jagi, ja dan áiggis leat čuoigamat ovddiduvvon ja leat dál máilmmi stuorámus dálvefalástallamat doaimmashehttejuvvon olbmuide.

Lea duostamis sáhka

Prinseassa dearvvahii čuigiid, mieldečuovvuid ja gehččiid Sjoa Ridderspranget muitalusain. Dat lea muitalus riddár Sigvat birra gii gájui sihke iežas ja iežas ráhkkása doarrádalliin go duosttai njuiket juova nuppebeallái. 

- Historjá muitala duostilvuođa birra, ahte duostat juoidá bargat, logai Prinseassa. Nugo Erling Stordahl barggai 50 jagi dás ovdal: Álggahii unna čuoigangilvvu čalmmehemiid váste ja sin váste geain lea heittot oaidnu, ja dat čuoigamat leat dál sturron ja šaddan lágideapmin mii bistá olles vahku, ja mas leat ollu doaimmat maidda sáhttá searvat. Riddárvahkku lea dál máilmmi stuorámus jahkásaš dálvelágideapmi doaimmashehttejuvvon olbmuide, ja nu lea ge duostilis álgojurdda šaddan máinnasin.

Láidesteaddjit

Čuigiin leat láidesteaddjit mielde, ja dán jagi lei sihke Prinseassa ja Ruvdnaprinsabárra mielde láidesteaddjin. Prinseassa čuoiggai vihtta kilomettara fárrolaga Kjetil Nilseniin, ja Ruvdnaprinseassa Mette-Marit lei Cathrine Nøttingnes láidesteaddji ja Ruvdnaprinsa Haakon ges čuovui Helge Flo vihtta ja 20-kilomettar láhtus.

Gonagaslaš Allavuohta Prinseassa Ingrid Alexandra ja Prinsa Sverre Magnus leigga maid Beitostølenis odne, ja soai leigga veahkkin medáljajuohkimis.

Maŋŋel čuoigamiid boradedje Gonagaslaš olbmot lunšša moallabáikkis ovttas čuigiiguin, lágideddjiiguin ja gussiiguin.

Leamaš mielde 50 jagi

Go lei vihttalotjagi ávvudeapmi dán jagi, de čalmmustahtte maid guoktása geat leamaš mielde čuoigamiin juohke jagi. Prinseassa Märtha Louise attii medálja Kåre Dahlii, ja Ruvdnaprinseassa attii medálja Gunleik Bergerudii. Soai leaba goappešagat čuoigan riddárčuoigamiid juohke jagi dan 50 jagi go dat leat lágiduvvon.

Gonagaslaš searvan Riddárčuoigamiidda lea maid boares árbevierru. Gonagas Olav rabai vuosttaš čuoigamiid cuoŋománus 1964. Gonagas Olav lei maid dieid čuoigamiid suodjaleaddji gitta dassážii son jámii 1991:s. Gonagas Harald doalai gieđas Riddárčuoigamiid suodjaleaddjin 1992 rájes 2006 rádjái, go Prinseassa Märtha Louise álggii suodjaleaddjin. Gonagasbearraša lahtut leat maid leamaš mielde láidesteaddjin ollu gerddiid.

Juogat dán artihkkala Twitteris ja Facebookas:

Juogat dán artihkkala Twitteris Juogat dán artihkkala Facebookas