Ruvdnaprinsabára Foanda
Ruvdnaprinsabára Foanda dáhttu čalmmustahttit nuorravuođaáiggi ja fátmmastit nuoraid mat iešguđetlágan sivaid geažil leat šaddan olggobeallái searvevuođa.
Ruvdnaprinsabárra ásahii Ruvdnaprinsabára Foandda sudno heajaid oktavuođas borgemánu 25.beaivvi 2001.
Foanda bargá dan ala ahte buot nuorat Norggas galget beassat oassálastit servodagas, leš dal oahpus, barggus, dahje sosiála oktavuođain. Danin foanda doarju ja ovttasbargá prošeavttaiguin mat addet nuoraide arenaid gos besset dovdat hálddašeami, gullevašvuođa ja searvevuođa.
Ovttasbargu válljejuvvon prošeavttaiguin
Ruvdnaprinsabára Foanda doarju prošeavttaid mat nannejit nuoraid. Prošeavttat ráhkadit arenaid hálddašeapmái ja oassálastimii, nu ahte nuoraide lea vejolašvuohta ovddidit iežaset dáidduid ja diehttelasat oassálastit searvevuođas.
Foanddas lea lagas ovttasbargu prošeavttaiguin beaivválaččat, ja ovttasbargoguoimmit addet mávssolaš gelbbolašvuođa ja rávvagiid.
Maŋemus háve go ođđa prošeakta beasai mielde, lei jagis 2023. Go rahppo ođđa ohcamušaide, de dat almmuhuvvo Foandda neahttasiidduin ja sosiála mediain.
Jagis 2026 leat dát Foandda prošeavttat:
- Ung Invest AIB
- Dale Oen Experience
- Get Academy
- Air UNG
Dasa lassin lea Ruvdnaprinsabára Foanddas iežas prográmma: Flyt.
Foanda lea ovdal maiddái dorjon Catalysts, VIBRO, Trivselsleder, Lærervikaren, Pøbelprosjektet, Drive for Life ja Cousins. Loga eanet prošeavttaid birra foandda siidduin.
Boahttevuođadeaivvadeapmi
Foanda lea 2021 rájes bovden nuoraid jahkásaš Boahttevuođadeaivvadeapmái. Dás ožžot nuorra oasseváldit vejolašvuohta digaštallat áigeguovdilis fáttáid ja gaskkustit iežaset oaiviliid daidda geat mearridit.
Ekonomiija ja ovttasbargoguoimmit
Ráđđehusa headjaskeaŋka dagaha stuorámus oasi Foandda ekonomalaš vuođđokapitálas,ruvdno juohke riikkaássi nammii.
Ovttasbargoguoimmit maiddái fállát ekonomalaš doarjaga, gelbbolašvuođa ja čehppodaga.
Foanda lea mielde ovddideame ovttasdoaibmama mas máŋga aktevrra olles servodagas leat mielde ráhkadeame buriid, ceavzilis čovdosiid nuoraide ja nuoraiguin. Foandda neahttasiidduin gávdno oppalašgovva ovttasbargoguimmiin.
Organiseren
Ruvdnaprinsabára Foanda lea organiserejuvvon vuođđudussan. Stivra ii oaččo makkárge mávssu dahje buhtadusa.
Ruvdnaprinsabárra vuoruha bargat nuoraiguin Norggas ja nuorra jođihemiin. Gonagaslaš hoavva lea veahkkin Ruvdnaprinsii ja Ruvdnaprinseassai sudno virggálaš barggus, masa maiddái gullá foandda fitnodatdoaibma.
Eanet dieđuid organiserema ja foandda barggu birra, gávdná foandda siidduin.